von 
Am 08:30 treffed sich 9 sportlichi Fraue, sozäge Raserinne, zum Skitag ide Melchsee-Frutt. Mer hetti chöne d’Händsche vergesse, hät C.G. aber nöd. I de Gondle hät sich e muetigi Mitarbeiterin vo de Bergbahne zu eus ine druckt, sie hät de grad de Job als Fotografin für euses obligate Gruppefoti überno. Da mir das jetzt scho erlediged händ, hettet mir scho wieder hei chöne, simmer aber nöd. Ufem Berg acho, hämmer eus mit em Händsche-Fresser (Seilzug) über de See zieh la. Da debi het mer chöne d’Skibrülle verlüre, hät K.S. aber nöd. Es hetti viel Lüüt chöne ha, häts aber nöd. Drum hämmer jedi Piste usprobiert, bis zum erste Kaffihalt. Det hät I.H. en Kampf mit ihrem leere Schoggipapierli gha, wo’s hetti chöne devo winde, isch’s aber nöd. Nach dere Stärkig hämmer e hufe Pistekilometer gnosse bi schönen Wetter trotz Sahara-Staub, es hett au chöne regne, häts aber nöd. Mit hungrige Büch simmer id Bettenalp ikehrt, es gmüetlichs Bergbeizli mit Selbstbedienig und händ es feins Zmittagesse bstellt. Wie isch jetzt das letscht Mal gsi, de Fraue mit silbrigem Haar isch s’Esse serviert worde? So simmer extra an gliche Tisch g’sässe und sind gspannt gsi, ob mir das au na schaffed. Siehe da, de netti, älteri Herr, hät eus doch tatsächlich s’ Esse au an Tisch bracht. Entweder simmer so schnell g’altered oder eifach wahnsinnig sympathisch überecho. Nachere längere Pause hämmer denn nach einer Sesselfahrt scho wieder en Apéro brucht und sind im Bonistock, bi de coole und krasse id Gartebeiz ghöckled. Bi guete Gspröch und viel Glächter simmer die verschiedne Gäst chli dure gange. Es hät schöni und nöd so schöni gha. Und öpis muess de scho na erwähnt werde, Manne mit Schneeschueh, gsehnd eifach nöd so sexy us. Langsam hät d’Sunne ihri Chraft verlore und so simmer wieder mit de Gondle is Tal und händ eus uf de Weg gmacht Richtig Obfelden. Vier unermüedlichi sind de na miteme Mitbringsel is Root’s uf Affoltere go Znacht esse und de Abig gmüetlich usklinge la.
Es isch en wunderschöne Tag gsi mit kei spezielle Ereigniss, drum sueched mir für nächst Jahr de na es Opfer wo mitchunt.
Grüssli us de Sahara
Bericht Marianne Kenel & Co.
