von oder Riemli-Drama Rundi 2
15 Fraue händ sich am 7.15 Uhr uf em Zendi PP i 3 Autos verteilt. Mit em flüssige Verkehr, simmer gli in Flüele uf em PP vo de Eggberge Luftseilbahn acho. D Bushaltestell isch grad gägenüber gsi. De Bus isch cho und d’Rue verbi… bis ad Talstation Kinzig hät er öis chauffiert.
I dem chline Seilbähnli händ 8 Persone Platz gha und so hämmer öis ufteilt. «Umstiege i de Mitteltation», hät öisi umsichtig Colette na gseit. Det isch en weise Ma scho parat gstande zum öises Gepäck z verstaue, usserhalb vom Bähnli! Öb ächt dobe na alles da isch? Warum Weide? Er hät gli begriffe, dass er als Ma schlächti Charte hät bi dere wibliche Übermacht! Mer händ dänn na chönne wähle zwüsched em Viehtransporter oder em Personebähnli. Vom Grüene is Wisse simmer mit em Bähnli gfahre, en freie Has hämmer na umenandhopple gseh, und scho simmer a de Bergstation acho. Fründli empfange simmer worde mit Kafi und Gipfeli im helle, nöie Restaurant.Dankä Colette für d Gipfeli.
Und jetzt s montiere vo de Schneeschue, all Jahr s gliche Drama!! Wie legg ichs a, wo müend jetzt d Riemli ane, inne oder usse? und hebets??? Mir sind ja immer nachli gschädiget vo de letschtjährige Schneeschuetour…D Maja hät scho vorgsorget, ihri Schue händ das Jahr nume en Chnopf zum drehe. D’Eva hät 2m Riemli mitgnah, mir sind versorged, sött mer meine!! Plötzli en Schrei und Bluet im Schnee, was isch passiert? En Unfall? Riemli explodiert? Nei, en Teleskopstock hät de Klara d Huut iklämmt und ufgrisse. Dank sofortiger Reanimation und Verarztig vor Ort, isch d Patientin wider marschbereit gsi…Es isch im Fall erst 10i und scho so vill Ufregig!
Abmarsch i die wunderschöni wissi Bergwält mit Panoramablick, Sunne und blauem Himmel uf em Winterwanderweg. Sanft und gmüetlich isches berguf und gradus gange. Gli händ die erste Fraue scho mind. 1 Schicht Chleidig müesse abzie, so warm isches gsi. En Hund hämmer zwüschedure bespassd, händ em Schneeballe zuegrüehrt und er hät sie mit elegante Sprüng gfange, bi mir hettis echli anders usgseh… E gueti Stund simmer gwanderet, plötzli heissts « Stopp, Riemlibruch!» de Mirj ihre Schue, usgleiht vo de Nachbarin, isch unde a de Sohle broche… de Eva ihre erst Meter muess herä. De Rega, wo grad heregfloge isch, hämmer chönne abbrichte, flotte Service. Nach em Ruogig, en Wiler bim andere Seilbähnli, hät dänn de Schneeschuewäg agfange und erst jetzt eigentli sind die Schneeschue brucht worde! Amene herzige Bäsebeizli grad am Wäg hämmer mit brüelende Auge müesse verbilaufe, nüt häts gheisse. Die nöchste Beizlis sind zue gsi… e schlächts Omen? De höchsti Punkt, d Hüenderegg isch in Sichtwiti und de Fleschkiosk, öisi Mittagspause grad hine une. Na es paarmal ufe und abe und mir sind fründlich empfange worde, e wahnsinns Ussicht zum Vierwaldstättersee bis hindere zum Sempachersee, lut em Beizer. Chässchnitte, Suppe, Würstli, mmhh fein ischs gsi…Und s Motto «Komme als Gast, gehe als Freund» hät genau passt.
Nacheme Dessert, feine Kafi evt. mit Schuss und em WC-Gang ohni Spüelig, defür mit Wasser schöpfe – wie gnüss ich jetzt mis WC wider!!! und em obligate Gruppeföteli, mit original Fingerabdruck vom Wirt, simmer ufbroche. D Mirj staht echli schräg uf de Schue!? Ah das muess so sii…!! De höchsti Punkt 1874 m. ü. M ebä d Hüenderegg hämmer mit volle Büch erstiege. Nöd all sind mitcho, die hämmer dänn am Schluss wider troffe. Dänn isches abwärts gange, meh oder weniger gsittet, bi 15 Fraue! Bis dänn öisi Berggeisse, Mirj und Trudi, usbroche und de unberüehrti Hang durab grutscht sind. Det isches passiert, d Mirj isch umgheit und? Riemlibruch!! De underi Teil isch ganz wegbroche, so fescht, dass nüd meh gnützt hät, au keis Riemli vo de Eva!! und d Mirj de Schue hät müesse abzieh und i dem immer weichere Schnee ohni die breiti Flächi, müehsam witerlaufe.. Lustigi Bilder häts gä, immer wieder isch sie plötzli en halbe Meter witer unne gsi… Puhh, guet isch sie na jünger, ich hetti das nöd möge, immer wieder mich usem Schnee use z’stämme, mir häts glanged nachemene sanfte Sturz, won i wie en Chäfer uf em Rugge glandet bin und nur mit Hilf wider ufstande bin… Immer wärmer isches worde, de Schnee immer weicher und weniger und immer meh bruni Fläcke häts gä, mängsmal so vill brun, dass es paar Fraue beschlosse händ d’Schneeschue abzieh, nöd die bescht Idee.. Juhuii d Bergstation Eggberge isch vor öisere Nase gsi und d’Usrisser händ öis en gmüetliche Platz reserviert, Dankä. Öise Ängel s’Trudi, hät öis mit de nötige Vitamine versorget, e roti Wälle, wer meh wott wüsse, muess nöchst mal mitcho. Toffifee sind plötzlich au na uf em Tisch gläge, na meh Vitamine!! Dankä Yolanda. So jetzt nachli Bei streckä und plötzli chunt d Mirj barfuess z’laufe, was isch dänn jetzt scho wider?? Dur de vill Schnee händ d Schue durela und mer hät chönne d Sohle richtig usdrucke so vill Wasser häts im Schue gha. Aber au da weiss »Frau» Bscheid, Original Mirj:
1. Plastikseckli für die nasse Söcke
2. Plastikseckli, trochni Socke azieh, Plastikseckli drüber in Schue inneschlüfe
3. Plastikseckli dito gägeglich
So, jetzt hämmer alli Platz im Seilbähnli und vill roti Chöpf sind äng zäme gstande und händ d Talfahrt abe zu öisene Autos gnosse. Dänn isches as Abschidnä gange, nach öppe 3 Umverteilige vo Frau und Gepäck, wer fahrt jetzt mit wem? händ dänn all es Auto gfunde. Es paar Unverfroreni händ als Abschluss na de letschti frei Tisch im Restaurant Huwyler verwütscht. Mir händ wider vill Gescht cho und aber wieder ga gseh, warum? ich weisses nöd!! Mir händ de Tag namal Revue passiere la und Sexy Wi trunke, wievill Fläsche darüber schweigt der Schreiberins Höflickeit. De Chällner isch sicher truurig gsi, wommer dänn äntli de Usgang gfunde händ.
Liebi Colette, danke, danke für die super Organisation und Reiseleitig, mit dinere ruhige und liebevolle Art, isch es wieder e wunderschöne Tag gsi
Bericht Gerda Stettler
